11.12.2025

Стопанска банка, Министерството за култура и туризам и Природонаучниот музеј – Скопје потпишаа Меморандум за стратешко партнерство за модернизација и дигитализација на музејот

Министерот за култура и туризам Зоран Љутков, Генералниот извршен директор на Стопанска банка Хрисула Кутуди, и директорот на Природонаучниот музеј - Скопје Ивица Заркадов денес потпишаа Меморандумот за трогодишно стратешко партнерство, со кој се воспоставува соработка за модернизација и дигитално обогатување на музејот.

Потпишувањето на меморандумот се случува во пресрет на 100-годишен јубилеј од основањето на оваа музејска институција следната 2026 година.
Министерот Љутков во изјава за медиумите изрази благодарност до Стопанска банка што ја препозна важноста и потенцијалот на музејот како национален центар за еколошко и научно образование.

„Овој Меморандум е потврда за тоа како јавниот и приватниот сектор можат успешно да соработуваат за создавање подобри услови за учење, за иновативни културни и научни содржини и за поддршка на младите генерации. Особено ме радува што проектите што ќе се реализираат, од „Магичната соба“, до подобрената пристапност, модерната веб-страница и новите дигитални алатки, директно ќе влијаат врз развојот на љубопитноста, знаењето и креативноста кај најмладите посетители“, потенцираше Министерот Љутков.

Генералниот извршен директор и Претседател на Управниот одбор на Стопанска банка, г-а Кутуди, нагласи дека Банката негува долга традиција во поддршката на образованието, науката и јавните институции.
„Ми претставува особено задоволство да бидам денес тука како претставник на тимот на Стопанска банка, посветени на новото партнерство со Музејот на природни науки и со Министерството за култура и туризам.
Стопанска банка негува долга традиција на поддршка на образованието, науката и на јавните институции. Се надевам дека со ова партнерство ќе придонесеме за нови интерактивни и имерсивни искуства за илјадниците деца кои го посетуваат Музејот секоја година продолжувајќи ја со тоа научната мисија градена веќе еден век.
Им благодарам на Министерството за нивната насока и поддршка и на тимот на Музејот за нивната енергија и инспирација во соработката со нашиот тим. Со нетрпение очекувам да се сретнеме повторно тука на отворањето на новите дигитални поставки.“, истакна Кутуди.

Директорот на Природонаучниот музеј г. Заркадов изрази благодарност до Стопанска банка за значајната донација од 150.000 евра, која ќе овозможи обновување на влезниот портал и холот, изградба на првата интерактивна „MAGIC ROOM“ во Македонија и целосна модернизација на веб-страницата. Тој истакна дека овие промени ќе го направат музејот поатрактивен и за учениците и младите, и за туристите, и дека ова претставува прва ваква поголема донација директно вложена во музејската зграда во неговото столетно постоење.