Јавен повик за акционерско собрание 27.4.2026

Врз основа на член 27 и член 29 од Статутот на Стопанска банка АД – Скопје (С.О. бр. 496/30.5.2025 година, пречистен текст), Надзорниот одбор на СБ на седницата одржана на 24.3.2026 година донесе Одлука за свикување на 56-та седница на Собранието на акционери на СБ (Н.О. бр. 20/2026 од 24.3.2026 година).

Седницата на Собранието ќе се одржи на 27 април, 2026 година (понеделник), во 12.00 часот, во седиштето на СБ, Централа, на ул. „11 Октомври“, бр. 7, 1000 Скопје (влез во Градскиот трговски центар).

Јавниот повик можете во целост да го прочитате на линкот од нашата веб-страница.

Стопанска банка АД - Скопје

Информација за дигитални канали 21.3 (сабота)

Почитувани клиенти,

Ве известуваме дека по повод празникот Рамазан Бајрам, филијалите на Стопанска банка АД – Скопје нема да работат на:

• 20.3.2026 (петок)

На располагање ги имате дигиталните услуги достапни преку m-banking, e-banking и банкоматите на СБ, како и партнерите од трговската мрежа кои ги прифаќаат картичките од СБ.

Платформата МИПС нема да биде оперативна за трансакции на 20.3.2026, согласно објавениот календар на институцијата.

Вработените и менаџментот на Банката ви го честитаат празникот!

Сонуваме Менуваме vol.7 со 2 претстави во Скопје

Изминатиот викенд Националната опера и балет беше исполнета со радост, енергија и силни инклузивни пораки.
Банката со голема гордост ги промовираше двата концерти од инклузивната музичко–театарска претстава „Музичка beat-ка“, реализирани во рамки на нашата долгогодишна општествено одговорна кампања „Сонуваме. Менуваме.“ која веќе 7 години активно ја промовира социјалната инклузија на лицата со попреченост.

Уживавме во емоциите и ентузијазмот на децата кои со насмевки пристигнуваа и оставаа искрени пораки за инклузија на специјалниот банер поставен на влезот.
На сцената, сите актери рамноправно учествуваа, пренесувајќи ја пораката за прифаќање и еднаквост преку нова, креативно преработена популарна музика, многу игра, шеги и креативност.

Банката упатува искрена благодарност до актерите и до тимот од ОхО продукција, кои со својата посветеност, труд и уметнички пристап секоја година ја претвораат оваа претстава во вистинско инспиративно искуство. Нивната енергија и соработка со децата придонесуваат пораката за инклузија да стигне до што повеќе срца.

Заедно продолжуваме да сонуваме и да менуваме – создавајќи општество во кое секое дете има простор да блесне. 

Од седмото издание на проектот одобрени беа и веќе се во фаза на реализација нови 16 грантови за асоцијации на деца со попреченост во земјата. 

Стопанска банка
На ваша страна

Најава за планирани активности и прекини

Најава за планирани активности и прекини

Почитувани, 

Ве известуваме дека согласно со планираните активности за редовни системски надградби и одржувања во недела 01.3.2026 во раните утрински часови можен е краткотраен прекин на достапноста на дигиталните сервиси на Банката. 

Ви благодариме на разбирањето.

Стопанска банка
На ваша страна

Засилена автентикација при електронски плаќања

Го споделуваме соопштението од Македонската банкарска асоцијација со кое се информира јавноста дека, согласно Законот за платежни услуги и платни системи, со кој во националното законодавство е транспонирана Директивата (ЕУ) 2015/2366 за платежни услуги на внатрешниот пазар (PSD2), од 1 март 2026 година започнува примената на засилена автентикација на корисниците (Strong Customer Authentication – SCA) при извршување одредени платежни трансакции.

Засилената автентикација ќе се применува кај платежни трансакции иницирани на далечина, и тоа:

• плаќања со платежни картички при електронска трговија, како и
• кредитни трансфери иницирани преку интернет-банкарство или мобилни апликации на банките.

Воведувањето на засилената автентикација има за цел подигнување на нивото на безбедност на електронските плаќања, намалување на ризикот од неовластени трансакции и подобра заштита на корисниците на платежни услуги, при што електронските и дигиталните плаќања ќе продолжат да се извршуваат непречено, со дополнителен безбедносен чекор.

Засилената автентикација се заснова на користење на најмалку два од следните три меѓусебно независни елементи:

• Елемент на знаење – нешто што го знае корисникот (на пример лозинка или ПИН),
• Елемент на поседување – нешто што го поседува корисникот (на пример мобилен уред, токен или платежна картичка),
• Елемент на својство – нешто што е својствено за корисникот (биометриски податоци, како отпечаток од прст или препознавање лице).

Во таа насока, досегашните начини на потврда на трансакции, како што се еднократни кодови доставени преку СМС или електронска пошта, кои се користат во рамки на постојните 3-D Secure решенија, ќе бидат заменети или надградени со посовремени и побезбедни механизми, во согласност со барањата на засилената автентикација.

Секоја банка, согласно законската рамка и сопствените технички и организациски можности, самостојно ќе го дефинира моделот на засилена автентикација, односно комбинацијата на елементи што ќе ги применува, поради што начинот на автентикација и корисничкото искуство може да се разликуваат од банка до банка.

Информации за клиентите на Стопанска банка

Во рамки на процесот на воведување на засилената автентикација, банките ќе пристапат кон информирање и едукација на своите клиенти за применуваните решенија, постапките за автентикација и практичните чекори при извршување на платежни трансакции, преку сопствените комуникациски канали.

Примената на засилената автентикација претставува значаен чекор во усогласувањето на платниот систем со европската регулаторна рамка, придонесувајќи кон зголемена сигурност, доверба и заштита на корисниците при користење на современите електронски платежни услуги.

Македонската банкарска асоцијација, заедно со банките-членки, останува посветена на унапредување на безбедноста и стабилноста на платниот промет, како и на поддршка на процесите на дигитализација и модернизација на платежните услуги.

Финансиски резултати за 2025 година

Стопанска банка ја заврши 2025 година со солидни финансиски резултати и континуиран напредок во трансформацијата

Врз основа на објавените неревидирани финансиски резултати објавени на Македонска берза, Стопанска банка оствари добивка пред оданочување и исправка на вредност во износ од 84,5 милиони евра, што го одразува отпорниот перформанс во година исполнета со предизвици во домашната и глобалната економија.

Вкупната актива забележа пораст од 9,1%, поради силниот органски раст на депозитите од 10,4%. Кредитите исто така забележаа пораст за 10,2% во двата сегмента, за население и корпоративни клиенти – потврдувајќи ја посветеноста на Банката кон поддршка на реалната економија.

Остварената стапка на поврат на капиталот (RoE) во 2025 година изнесува 11,7%, како и стапка на поврат на актива (RoA) од 2,2%. Стопанска банка останува добро капитализирана, со вкупен капитал од 466 милиони евра, и силна ликвидносна позиција со однос кредити/депозити од 91%, што укажува дека потенцијалот за финансирање на Банката и понатаму е ефикасно насочен кон кредитирање на населението и компаниите.

Во текот на 2025 година Банката ја заокружи првата година од својата интензивна трансформација, фокусирајќи се на модернизација, дигитализација и оперативна ефикасност — што ќе продолжи и во наредните години со цел позиционирање на Стопанска кон одржлива и просперитетна иднина. Трансформацијата е придружена и со организациски и менаџерски зајакнувања. Управниот одбор сега е составен од седум членови кои ги покриваат сите деловни линии, зајакнувајќи го внатрешното управување, менаџерскиот извршен капацитет и одговорноста кон целите на Банката.

Поддржана од силната позиција на НБГ Групацијата, Стопанска банка ги користи заедничките искуства, најдобрите практики и значајните инвестиции за унапредување на сите процеси и севкупната трансформација, притоа обезбедувајќи континуитет, прудентно управување на ризиците и постојаното подобрување на услугите кон клиентите.

Д-р Емилија С. Ивановска - Генерален директор за управување со ризици, член на УО

Стопанска банка со задоволство објавува дека со добивање на соодветните лиценци, назначен е нов член на Управниот одбор д-р Емилија Стојанова Ивановска, на функцијата Генерален директор за управување со ризици.

Д-р Стојанова Ивановска е долгогодишен професионалец во банкарството со две децении искуство во Банката, од кои 15 години на менаџерски позиции. Таа поседува длабоко аналитичко и стратешко знаење во областа на управувањето со кредитниот ризик, управување со квалитет на кредитното портфолио и наплата, како и управување со ликвидносните и пазарните ризици.

Во текот на својата кариера водеше клучни проекти во областа на ризиците, меѓу кои развој и надградба на моделите за кредитно оценување, развој на политиките за управување со ризици и учество во бројни одбори на Банката.

Д-р Емилија Стојанова Ивановска е доктор на економски науки со специјалност во управување со кредитен ризик со примена на економетрија и статистички методи и модели. Таа е активен учесник во професионални и академски форуми, панелист на конференции и гостин-говорник на повеќе високообразовни институции. Со повеќегодишно учество во Кредитните Одбори и Одборот за управување со ризици, како и активно учество во Комисијата за ризици при МБА таа има воспоставено силен професионален кредибилитет и препознатлива експертиза во банкарскиот сектор.

Со ова назначување, Стопанска банка АД – Скопје ја зацврстува својата заложба за силно корпоративно управување, стабилен систем за управување со ризици и примена на највисоките стандарди во работењето.

Стопанска банка го овозможи Apple Pay за своите клиенти - безбеден и сигурен начин на плаќање преку Apple уреди

Стопанска банка од денеска на своите клиенти им го овозможува Apple Pay за брз, едноставен и безбеден начин на плаќање со своите Visa и MasterCard платежни картички користејќи Apple уред.

За користење на Apple Pay и дигитализација на VISA и MasterCard платежните картички, потребно е клиентите да ја превземат бесплатната мобилна апликација Apple Wallet, а поради засилената автентикација мора да се и активни корисници на мобилната апликација на Стопанска банка.

Секое купување со Apple Pay е безбедно бидејќи е автентицирано со идентификација на лице (Face ID), идентификација преку допир (Touch ID) или лозинка на уредот. Со Apple Pay може да се плаќа на сите продажни места кои имаат ПОС терминал со бесконтактен читач и прифаќаат бесконтактно плаќање, како и на интернет-страници и апликации кои прифаќаат Apple Pay. И подигнувањето на готовина од банкомати е овозможено на уредите што имаат бесконтактен читач, без потреба од самата физичка картичка.

Безбедноста и приватноста се основните начела во функционирањето на Apple Pay. Кога клиентите користат дигитализирана дебитна или кредитна картичка со Apple Pay добиваат слобода и се спокојни, затоа што бројот на платежната картичка никогаш нема да биде зачуван на уредот или на серверите на Apple и никогаш нема да биде споделен со трговците.

Apple Pay користи NFC технологија (комуникација во близина) за плаќања во продавница и го заштитува вашиот вистински број на картичката со користење на уникатен број специфичен за уредот и код за трансакција.
Со овозможување на услугата Apple Pay, Банката дополнително ја зајакнува својата стратегија за дигитална трансформација и ја збогатува понудата на иновативни дигитални банкарски решенија.

Повеќе информации околу користењето на Apple Pay се достапни на веб страницата на Банката.

Стопанска банка АД - Скопје
На ваша страна