ИСТОРИЈА НА БАНКАТА
Стопанска банка АД – Скопје е основана со Решение на Второто вонредно заседание на АСНОМ на 29 декември 1944 година под име Македонска Стопанска Банка. Со нејзиното основање поставени се темелите на банкарското работење во Македонија и во годините кои следат, скоро и да не постои позначаен објект, инвестиционен или развоен проект кој не бил подржан од Стопанска банка. Историјата на Банката ја одбележуваат сеќавања за тоа како се граделе хидроцентрали, инфраструктурни објекти, фабрички хали, мостови и автопати, сеќавања за тоа како растела и се развивала Република Македонија а со неа растела и се развивала и Стопанска банка.
Во сиве години на развој и раст, Банката се адаптираше на сите карактеристики на општественото и економско уредување, почнувајќи како банка на комунални банки, па здружена банка организирана во филијали, до трансформацијата во акционерско друштво во 1990 година. На почетокот на новиот милениум, Стопанска банка преку приватизацијата, станува дел од Групацијата на Националната банка на Грција, една од најголемите и најуспешни банкарски групации во Европа.Како што и секојдневниот живот се состои од предизвици, успеси и тешки моменти, така и Банката во своите бројни години на традиција се соочи со многу предизвици. На почетокот, предизвикот да се изгради земјата разрушена од војна, подоцна да се поддржи економскиот и општествен развој а во новиот милениум Банката се соочи со можеби најголемиот предизвик досега, да се трансформира и преструктуира во модерна финансиска институција организирана согласно врвните меѓународни банкарски практики, и со тоа да ја поддржи трансформацијата на македонската економија во денешната функционална пазарна економија.
Денес, со повеќе од 1 милион клиенти физички лица, со над 50% од активните компании во Македонија како клиенти, можеме да кажеме дека сме Банка на секое семејство и партнер на скоро секоја компанија во земјата. Со надминувањето на активата од над 1 милијарда евра станавме дел од групата на најголеми банки во регионот и најголема банка во Македонија.
Иднината на Банката е обврска да продолжиме понатаму со уште поголема посветеност и подготвеност секогаш да ги ислушаме, разбереме и подржиме здравите бизниси, ефикасно да го алоцираме штедењето и на тој начин да дадеме придонес кон отворањето на нови работни места и забрзувањето на економскиот развој. Сигурноста останува врвен приоритет и највисока вредност на корпоративната култура на Банката. Преку новите технологии Стопанска банка ќе стане дел од секојдневното живеење и ќе ги пресели своите шалтери во домовите на населението и канцелариите на претпријатијата. Ќе продолжиме да растеме потпирајќи се на нашето знаење, на новите и напредни технологии и на меѓународното искуство и know-how на нашиот мнозински акционер Националната банка на Грција.
Стопанска банка ќе продолжи да биде мост преку кој се поврзуваат традицијата, сегашноста и иднината и останува секогаш да биде на ваша страна.
